လေဗာကူဆင်အသင်းနည်းပြ ဇာဘီအလွန်ဆိုက မနက်ဖြန်မနက်ပိုင်းမှာ ကစားမယ့် အတ္တလန်တာအသင်းနဲ့ ယူရိုပါလိဂ်ဗိုလ်လုပွဲစဉ်အတွက် သူတို့ယုံကြည်မှုရှိတယ်လို့ ဆိုခဲ့ပါတယ်။
လေဗာကူဆင်အသင်းဟာ ဒီရာသီမှာ ပြိုင်ပွဲစုံရှုံးပွဲမရှိတာ ၅၁ ပွဲအထိရှိလာခဲ့ပြီး ဘွန်ဒက်လီဂါဖလားလည်း ရယူထားနိုင်ခဲ့သလို ယူရိုပါလိဂ်နဲ့ ပိုကယ်လ်ဖလားပြိုင်ပွဲမှာ ဗိုလ်လုပွဲကို ရောက်ရှိနေတာပါ။အဲ့ဒါကြောင့် လေဗာကူဆင်အသင်းဟာ တစ်ရာသီလုံးရှုံးပွဲမရှိစံချိန်နဲ့ ဆုဖလား ၃ လုံးရယူနိုင်မယ့် အခွင့်အရေးကို ပိုင်ဆိုင်နေတာဖြစ်ပါတယ်။
အတ္တလန်တာအသင်းကလည်း နှစ်ပေါင်း ၆၁ နှစ်ကြာဆုဖလားနဲ့ ဝေးကွာနေတာကို အဆုံးသတ်နိုင်ဖို့ ပစ်မှတ်ထားနေတာကြောင့် လေဗာကူဆင်အသင်းအတွက် ခက်ခက်ခဲခဲယှဉ်ပြိုင်ရမယ်ဆိုတာ သေချာနေတာပါ။ဒါပေမယ့် ဇာဘီအလွန်ဆိုကတော့ ဒီပွဲအတွက် ယုံကြည်မှုရှိတယ်လို့ ဆိုခဲ့တာဖြစ်ပါတယ်။
ဇာဘီအလွန်ဆိုက “ကျနော်တို့အာရုံစိုက်ပြီး ပွဲကိုပြင်ဆင်နေကာ ဘာမှပြောင်းလဲမှုမရှိပါဘူး။ကျနော်တို့ ၅၁ ပွဲကစားခဲ့ပြီးပါပြီ၊ ကစားသမားတွေဟာ နားလည်မှုရှိပါတယ်။အခုအချိန်က ကျနော်တို့အကောင်းဆုံးပေးဆပ်ရမယ့်အချိန်ပါ။ဒီလိုအခိုက်အတန့်မျိုးအတွက် တစ်နှစ်ပတ်လုံးပြင်ဆင်ထားပါတယ်။ကစားသမားတွေက အဆင်သင့်ဖြစ်နေပါပြီ။အတ္တလန်တာကိုလေးစားပေမယ့် ဒီပွဲအတွက် ကျနော်တို့ ယုံကြည်မှုရှိတယ်”လို့ ဆိုခဲ့ပါတယ်။
အတ္တလန်တာအသင်းနည်းပြ ဂတ်စ်ပါရီနီကလည်း လေဗာကူဆင်အသင်းဟာ ပြီးပြည့်စုံတဲ့အသင်းဖြစ်တာကြောင့်သူတို့နဲ့ ရင်ဆိုင်ချိန်မှာ အမြန်ဆုံးလိုက်လျောညီထွေဖြစ်အောင် ကြိုးစားသွားမယ်လို့ ပြောခဲ့တာဖြစ်ပါတယ်။
