မန်စီးတီးအသင်းနည်းပြ ဂွာဒီယိုလာဟာ ၂၀၂၃-၂၄ ရာသီ ပရီးမီးယားလိဂ်တစ်နှစ်တာအကောင်းဆုံးနည်းပြဆုကို ရရှိသွားခဲ့ပါတယ်။
![](https://www.ballpwel.com/wp-content/uploads/2024/05/image-aea412ca-526c-4256-93b1-b233aaaef718-85-2560-1440-1024x576.jpeg)
ဂွာဒီယိုလာဟာ မန်စီးတီးအသင်းကို ပရီးမီးယားလိဂ်ပြိုင်ပွဲမှာ ၄ နှစ်ဆက်တိုက်ချန်ပီယံဆုရယူနိုင်တဲ့ ပထမဆုံးအသင်းဖြစ်လာအောင် ကိုင်တွယ်ပေးနိုင်ခဲ့တာကြောင့် ဒီဆုကို ရယူနိုင်ခဲ့တာပါ။ဂွာဒီယိုလာဟာ အခုနှစ်အတွက်ဆုကို အာဆင်နယ်အသင်းနည်းပြ အာတီတာ၊ဗီလာအသင်းနည်းပြ အူနှိုင်းအမ်မရီ၊လီဗာပူးလ်အသင်းနည်းပြ ကလောပ့်နဲ့ ဘုန်းမောက်အသင်းနည်းပြ အိုင်ရာအိုလာတို့ကိုအသာရပြီး ရရှိခဲ့တာဖြစ်ပါတယ်။
ဂွာဒီယိုလာကတော့ သူဟာ ဒီဆုကို ဆန်ခါတင်စာရင်းမှာ ပါဝင်တဲ့သူတွေအားလုံးနဲ့ မျှဝေချင်တယ်လို့ ဆုလက်ခံရယူအပြီးမှာ ပြောခဲ့ပါတယ်။ဂွာဒီယိုလာဟာ ပရီးမီးယားလိဂ်တစ်နှစ်တာအကောင်းဆုံးနည်းပြဆုကို ၅ ကြိမ်မြောက်ရယူနိုင်ခဲ့တာဖြစ်ပြီး သူ့ထက်ပိုပြီးဆုရရှိထားတဲ့သူကတော့ ယူနိုက်တက်အသင်းနည်းပြဟောင်း ဆာအဲလက်စ်ဖာဂူဆန်ဖြစ်တာပါ။ဆာအဲလက်စ်ဖာဂူဆန်ဟာ ဒီဆုကို ၁၁ ကြိမ်အထိရယူထားနိုင်ခဲ့ပါတယ်။
![](https://www.ballpwel.com/wp-content/uploads/2024/05/skysports-pep-guardiola-man-city_6561512-1024x576.jpg)
၂၀၂၃-၂၄ ရာသီ ပရီးမီးယားလိဂ်တစ်နှစ်တာအကောင်းဆုံးဆုတွေဖြစ်တဲ့ ကစားသမားဆုကို မန်စီးတီးအသင်းကွင်းလယ်လူ ဖိုဒန်နဲ့ လူငယ်ကစားသမားဆုကို ချယ်လ်ဆီးအသင်းက ကိုးလ်ပါလ်မာက ရရှိသွားခဲ့တာဖြစ်ပါတယ်။