မန်စီးတီးအသင်းဟာ ချယ်လ်ဆီးအသင်းကို ၁ ဂိုး-ဂိုးမရှိနဲ့ အနိုင်ရပြီး FA ဖလားဗိုလ်လုပွဲတက်နိုင်ခဲ့ပေမယ့် နည်းပြ ဂွာဒီယိုလာက ကစားသမားတွေရဲ့ကျန်းမာရေးအတွက် ဒီပွဲအချိန်ဇယားက လက်ခံနိုင်စရာမရှိဘူးလို့ဝေဖန်ခဲ့ပါတယ်။
မန်စီးတီးအသင်းဟာ ရီးရယ်လ်အသင်းကို ပင်နယ်တီအဆုံးအဖြတ်နဲ့ အရေးနိမ့်ခဲ့တဲ့ ချန်ပီယံလိဂ်ကွာတားဖိုင်နယ်မှာ ပွဲချိန်မိနစ် ၁၂၀ ကျော်အထိ ကစားထားရလို့ပွဲပန်းနေပေမယ့် ၃ ရက်အကြာမှာပဲ FA ဖလားဆီမီးဖိုင်နယ်ပွဲစဉ်ကို ကစားခဲ့ရတာပါ။ကြားရက်ထဲမှာ ဘာပွဲမှမရှိတဲ့ ယူနိုက်တက်နဲ့ ကိုဗင်ထရီအသင်းတို့ပွဲစဉ်ကို အစောမကန်ဘဲ သူတို့ပွဲကို အစောကစားခိုင်းခဲ့တာကို ဂွာဒီယိုလာက စိတ်ပျက်နေတာဖြစ်ပါတယ်။
ဂွာဒီယိုလာက “စနေနေ့ကစားခိုင်းခဲ့တာက လက်ခံနိုင်စရာမရှိပါဘူး။ကစားသမားတွေကျန်းမာရေးအတွက် မဖြစ်နိုင်သလို ဒါက ပုံမှန်မဟုတ်ပါဘူး။ဒီနိုင်ငံမှာ FA ဖလားက စပါယ်ရှယ်ဖြစ်တယ်ဆိုတာသိပေမယ့် ကစားသမားတွေရဲ့ကျန်းမာရေးက ရှိပါတယ်။ကျနော်တို့ဘယ်လိုရှင်သန်နေရလဲဆိုတာကို ကျနော်နားမလည်နိုင်ခဲ့ပါဘူး”
“ကျနော်တို့ကို ဘာကြောင့်မနက်ဖြန်ပေးမကစားတာလဲ။ချယ်လ်ဆီး၊ယူနိုက်တက်နဲ့ ကိုဗင်ထရီတို့ဆိုရင် ကြားရက်ထဲမှာ ပွဲမကစားခဲ့ရပါဘူး။ကစားသမားတွေကို အကာအကွယ်ပေးချင်ရုံပဲဖြစ်ပြီး အထူးအခွင့်အရေးတွေ တောင်းဆိုနေတာမဟုတ်ပါဘူး”လို့ ဆိုခဲ့ပါတယ်။
မန်စီးတီးအသင်းဟာ လာမယ့်ကြားရက်ထဲမှာ ပရီးမီးယားလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပါတယ်။