မန်စီးတီးအသင်းနည်းပြ ဂွာဒီယိုလာက ရီးရယ်လ်အသင်းနဲ့ ကစားမယ့် ချန်ပီယံလိဂ်ကွာတားဖိုင်နယ်ဒုတိယအကျော့ပွဲစဉ်မှာ အဓိက ကွင်းလယ်လူ ရိုဒရီကို အနားပေးမယ်လို့ နောက်ပြောင်သွားခဲ့တာဖြစ်ပါတယ်။
ရီးရယ်လ်နဲ့ မန်စီးတီးအသင်းတို့ ၃ ဂိုးစီသရေကျခဲ့တဲ့ ပထမအကျော့ပွဲစဉ်အပြီးမှာ ရိုဒရီက သူဟာ မောပန်းနွမ်းနယ်နေတာကြောင့် အနားယူဖို့လိုအပ်တယ်လို့ ပြောခဲ့တာပါ။အဲ့ဒါကြောင့် ဂွာဒီယိုလာဟာ လူတန်အသင်းကို ၅ ဂိုး-၁ ဂိုးနဲ့ အနိုင်ရခဲ့တဲ့ပွဲစဉ်မှာ ရိုဒရီကို အသုံးပြုခဲ့ခြင်းမရှိဘဲ အနားပေးသွားခဲ့တာဖြစ်ပါတယ်။
ဂွာဒီယိုလာက “သူဟာ အနားယူဖို့လိုအပ်ခဲ့ပါတယ်။လာမယ့် ရီးရယ်လ်နဲ့ပွဲမှာလည်း သူအနားယူရပါလိမ့်မယ်။ကျနော်နောက်ပြောင်နေတာပါ”လို့ ဆိုခဲ့တာပါ။
မန်စီးတီးအသင်းဟာ ၂၀၂၂ ခုနှစ် အောက်တိုဘာလနောက်ပိုင်း ပထမဆုံးအကြိမ်အဖြစ် ရိုဒရီမပါဝင်ဘဲ ပရီးမီးယားလိဂ်ပြိုင်ပွဲမှာ နိုင်ပွဲရယူနိုင်ခဲ့တာဖြစ်ပါတယ်။လူတန်အသင်းနဲ့ကစားခဲ့တဲ့ မန်စီးတီးအသင်းလူစာရင်းမှာ ပြီးခဲ့တဲ့ ရီးရယ်လ်အသင်းနဲ့ ပထမအကျော့ပွဲမှာ မပါဝင်ခဲ့တဲ့ ဝေါလ်ကာနဲ့ အကီတို့ ပြန်လည်ပါဝင်လာခဲ့တာကြောင့် မန်စီးတီးအသင်းလူစာရင်းဟာ ပိုတောင့်တင်းလာခဲ့ပြီဖြစ်ပါတယ်။
