ယူနိုက်တက်အသင်းဟာ မန်စီးတီးအသင်းနဲ့ ကစားမယ့် FA ဖလားဗိုလ်လုပွဲပြီးမှသာ နည်းပြ အဲရစ်တန်ဟတ်ရဲ့အနာဂတ်ကို ဆုံးဖြတ်မယ်လို့ ဗြိတိန်မီဒီယာအများအပြားက ဖော်ပြထားပါတယ်။
အဲရစ်တန်ဟတ်ဟာ ယူနိုက်တက်အသင်းက ပဲလေ့စ်အသင်းကို ၄ ဂိုး- ဂိုးမရှိနဲ့ ဂိုးပြတ်အရေးနိမ့်ပြီးနောက် နည်းပြရာထူးက ထုတ်ပယ်ခံရမယ့်ဖိအားတွေပိုတိုးလာခဲ့ပြီး ထုတ်ပယ်ဖို့တောင်းဆိုမှုတွေကလည်း များပြားလာခဲ့တာပါ။ဒါပေမယ့် ယူနိုက်တက်အသင်းကတော့ FA ဖလားဗိုလ်လုပွဲမတိုင်ခင်အထိ အဲရစ်တန်ဟတ်ကို ထုတ်ပယ်မှာမဟုတ်ဘဲ ဒီပွဲအပြီးမှ နောက်ဆုံး ဆုံးဖြတ်ချက်ကို ချဖို့ ရှိနေတာဖြစ်ပါတယ်။
ယူနိုက်တက်ကစားသမားအများအပြားကတော့ အသင်းရဲ့ဆိုးရွားတဲ့ရာသီကြောင့် ဒီရာသီအကုန်မှာ နည်းပြရာထူးက အဲရစ်တန်ဟတ်ထုတ်ပယ်ခံရမယ်လို့ ယူဆထားတာပါ။ယူနိုက်တက်အသင်းဟာ ပဲလေ့စ်အသင်းကို ရှုံးနိမ့်ခဲ့တာကြောင့် လာမယ့်ရာသီ ဥရောပဝင်ခွင့်ရယူနိုင်ဖို့ ခက်ခဲသွားခဲ့ပြီး လက်ကျန်ပွဲစဉ်တွေမှာ တွေ့ရမယ့်အသင်းတွေက အာဆင်နယ်၊နယူးကာဆယ်နဲ့ ဘရိုက်တန်အသင်းတို့ဖြစ်လို့ ခက်ခဲနိုင်တာဖြစ်ပါတယ်။
ဒါပေမယ့် FA ဖလားဗိုလ်လုပွဲမှာသာ မန်စီးတီးအသင်းကို အနိုင်ရခဲ့ရင် ယူရိုပါလိဂ်ဝင်ခွင့်ကိုရမှာဖြစ်ပေမယ့် လက်ရှိခြေစွမ်းတွေနဲ့ဆိုရင် ယူနိုက်တက်အသင်းအနေနဲ့ မျှော်လင့်ခွင့်နည်းပါးနေတာပါ။အဲရစ်တန်ဟတ်အနေနဲ့ ယူနိုက်တက်အသင်းကို FA ဖလားပြိုင်ပွဲမှာသာ ဗိုလ်စွဲအောင်လုပ်ပေးနိုင်ရင် လာမယ့်ရာသီဆက်ကိုင်တွယ်ရဖို့ ရှိနေပေမယ့် ရှုံးနိမ့်ခဲ့ရင်တော့ ထုတ်ပယ်ခံရဖို့ အလားအလာများနေတာဖြစ်ပါတယ်။