မန်စီးတီးအသင်းကွင်းလယ်လူ ဒီဘရိုင်းနားက ဆော်ဒီပရိုလိဂ်ကလပ်အသင်းတွေရဲ့မယုံနိုင်လောက်စရာငွေကြေးပမာဏနဲ့ ကမ်းလှမ်းမှုကြောင့် ဆော်ဒီပရိုလိဂ်ထံ ပြောင်းရွှေ့နိုင်တယ်လို့ ပြောခဲ့ပါတယ်။
ကမ္ဘာ့အကောင်းဆုံးကွင်းလယ်ကစားသမားတွေထဲက တစ်ဦးအဖြစ် သတ်မှတ်ခြင်းခံခဲ့ရတဲ့ ဒီဘရိုင်းဟာ မန်စီးတီးအသင်းမှာ ကစားခဲ့တဲ့ ၉ နှစ်တာကာလအတွင်းမှာဆုဖလားပေါင်း ၁၆ ခုအထိရရှိအောင် ကူညီပေးနိုင်ခဲ့တာဖြစ်ပါတယ်။ဒီဘရိုင်းနဲ့ မန်စီးတီးအသင်းတို့ချုပ်ဆိုထားတဲ့ စာချုပ်ဟာ ၁ နှစ်သာကျန်ရှိတော့ပြီး ဘယ်လ်ဂျီယံကစားသမားကို ခေါ်ယူဖို့ ဆော်ဒီပရိုလိဂ်ကလပ်အသင်းတွေက ချိတ်ဆက်မှုတွေပြုလုပ်နေတာပါ။
ဒီဘရိုင်းဟာ မန်စီးတီးအသင်းနဲ့ စာချုပ်ကုန်ဆုံးတော့မှာဖြစ်တဲ့အတွက် သူ့ရဲ့အနာဂတ်အတွက်ရွေးချယ်မှုတွေပြုလုပ်နေပြီး ဇနီးဖြစ်သူအတွက်လည်း နေရာအသစ်ကိုသွားရောက်ပြီး စွန့်စားခန်းဖွင့်ရတာ အဆင်ပြေတယ်လို့ ဘယ်လ်ဂျီယံသတင်းစာနဲ့ ပြုလုပ်ခဲ့တဲ့ အင်တာဗျူးမှာ ဆိုခဲ့ပါတယ်။
ဒီဘရိုင်းက “စာချုပ်က ၁ နှစ်ပဲကျန်တော့တာကြောင့် ဘာဖြစ်လာနိုင်မလဲဆိုတာ စဉ်းစားရပါမယ်။ကျနော့်သားအကြီးဆုံးက ၈ နှစ်အရွယ်ရှိပြီဖြစ်ပြီး သူဟာ အင်္ဂလန်ကလွဲပြီး ဘာမှမသိပါဘူး။သူက မန်စီးတီးမှာ ဘယ်လောက်ကြာကြာကစားမှာလဲလို့ ကျနော့်ကို မေးပါတယ်။ကျနော့်ရဲ့အသက်အရွယ်အရ အရာအားလုံးကို ဖွင့်ထားဖို့လိုပါတယ်”
“ကျနော့်ကစားသမားဘဝရဲ့အဆုံးသတ်ဖြစ်တဲ့ မယုံနိုင်လောက်စရာငွေကြေးပမာဏအကြောင်းကို ပြောနေတာဖြစ်ပြီး ဒါကို စဉ်းစားရမှာပါ။ဆော်ဒီမှာ ၂ နှစ်လောက်ကစားရင် မယုံနိုင်လောက်တဲ့ ငွေပမာဏကို ရရှိမှာဖြစ်ပြီး ကျနော်ကစားခဲ့တဲ့ ၁၅ နှစ်မှာ ဒီပမာဏကို မရရှိသေးပါဘူး။အဲ့ဒါကြောင့် ကျနော်ဟာ ဒါကို စဉ်းစားရမယ်”လို့ ဆိုခဲ့ပါတယ်။
