အသက် ၃၉ နှစ်အရွယ်ရှိ ရော်နယ်ဒိုဟာ အယ်လ်နာဆာအသင်းက အယ်လ်တိုင်အသင်းကို ၅ ဂိုး-၁ ဂိုးနဲ့ အနိုင်ရခဲ့တဲ့ ဆော်ဒီပရိုလိဂ်ပွဲစဉ်မှာ အသင်းအတွက် ဟက်ထရစ်ဂိုးသွင်းယူနိုင်ခဲ့တာဖြစ်ပါတယ်။
ဒီရာသီ ဆော်ဒီပရိုလိဂ်ပြိုင်ပွဲမှာ အယ်လ်နာဆာအသင်းအတွက် ခြေစွမ်းပြသနေတဲ့ ရော်နယ်ဒိုအတွက် ဒီဟက်ထရစ်ဟာ သူ့ရဲ့ကစားသမားဘဝမှာ ၆၄ ကြိမ်မြောက်သွင်းယူနိုင်ခဲ့တဲ့ ဟက်ထရစ်လည်း ဖြစ်ခဲ့တာပါ။ဒီဟက်ထရစ်ကြောင့် ရော်နယ်ဒိုဟာ ဒီရာသီ အယ်လ်နာဆာအသင်းအတွက် ပါဝင်ကစားထားတဲ့ ဆော်ဒီပရိုလိဂ် ၂၃ ပွဲမှာ ၂၆ ဂိုးသွင်းယူထားတာဖြစ်ပါတယ်။
ရော်နယ်ဒိုဟာ ဆော်ဒီပရိုလိဂ်ပြိုင်ပွဲဂိုးသွင်းအများဆုံးကစားသမားအဖြစ် ဒုတိယနေရာက အယ်လ်ဟီလယ်အသင်းတိုက်စစ်မှူး မီထရိုဗစ်ကို ၄ ဂိုးအသာရပြီးဦးဆောင်ထားတာပါ။ဒါ့အပြင် ရော်နယ်ဒိုဟာ ဂိုးဖန်တီးမှု ၉ ကြိမ်ပြုလုပ်ထားတာကြောင့် ဂိုးဖန်တီးမှုမှာထိပ်ဆုံးနေရာက မာရက်ဇ်နဲ့ ၁ ဂိုးအကွာ ဒုတိယနေရာမှာ ရပ်တည်နေတာဖြစ်ပါတယ်။
အယ်လ်နာဆာအသင်းဟာ ဒီပွဲအနိုင်ရခဲ့ပေမယ့် ဆော်ဒီပရိုလိဂ်ပြိုင်ပွဲ အဆင့် ၁ နေရာက အယ်လ်ဟီလယ်အသင်းနဲ့ ၁၂ မှတ်အကွာ အဆင့် ၂ နေရာမှာ ဆက်လက်ရပ်တည်နေတာပါ။အယ်လ်နာဆာအသင်းဟာ လာမယ့်ပွဲစဉ်အဖြစ် ဧပြီ ၂ ရက်မှာ အက်ဘာအသင်းနဲ့ ယှဉ်ပြိုင်ရမှာဖြစ်ပါတယ်။