အင်္ဂလန်အသင်းနည်းပြ ဆောက်ဂိတ်က အင်္ဂလန်အသင်းက အီတလီအသင်းကို ၃ ဂိုး- ၁ ဂိုးနဲ့ အနိုင်ရပြီး ယူရို ၂၀၂၄ ပြိုင်ပွဲယှဉ်ပြိုင်ခွင့်ရရှိသွားခဲ့ပြီးနောက် အသင်းဆီကနေ ဒီထက်ကောင်းတဲ့အရာတွေလာဖို့ ရှိသေးတယ်လို့ ပြောလိုက်ပါတယ်။
အင်္ဂလန်အသင်းဟာ လက်ကျန်ခြေစစ်ပွဲ ၂ ပွဲကစားဖို့ ကျန်ရှိနေသေးပေမယ့် ၆ ပွဲကစားအပြီးမှာ ၅ ပွဲနိုင်၊ ၁ ပွဲသရေနဲ့ ခြေစစ်ပွဲအောင်မြင်ခဲ့ပြီး လာမယ့်နှစ်ယူရိုပြိုင်ပွဲကို ယှဉ်ပြိုင်ခွင့်ရရှိခဲ့တာဖြစ်ပါတယ်။အင်္ဂလန်အသင်းနည်းပြ ဆောက်ဂိတ်က သူတို့ဟာ ယူရိုချန်ပီယံဆုရယူနိုင်အောင် လုပ်နိုင်တဲ့အသင်းတွေထဲမှာ ပါဝင်တယ်လို့ ပြောခဲ့ပါတယ်။
ဆောက်ဂိတ်က “ကျွန်တော်တို့ဟာ နောက်ထပ် ၂ ပွဲလုံးကိုလည်း အနိုင်ရအောင် ကစားသွားမှာဖြစ်ပြီး ထိပ်ဆုံးနေရာနဲ့ အဆုံးသတ်ချင်ပါတယ်။ကျွန်တော်တို့ဟာ ဆက်ပြီးတည်ဆောက်နေဖို့ လိုအပ်ပါတယ်။ဒီအသင်းဆီကနေ နောက်ထပ်လာဖို့တွေရှိနေပါသေးတယ်”
“ထိပ်တန်းအသင်းတွေကို ကောင်းမွန်စွာအနိုင်ယူခဲ့ခြင်းမရှိဘူးဆိုပြီး လူတွေက ကျွန်တော်တို့ကိုဝေဖန်ကြပါတယ်။ဒါပေမယ့် ကျွန်တော်တို့ဟာ အလွန်ကောင်းမွန်စွာစွမ်းဆောင်နိုင်ခဲ့ပြီး ဒီပွဲလိုပဲ အသင်းကြီးတွေကို ဆက်ပြီးအနိုင်ယူဖို့ လိုအပ်ပါတယ်”လို့ ဆိုခဲ့ပါတယ်။
