ပရီးမီးယားလိဂ်ဟာ စက်တင်ဘာလအတွက်အကောင်းဆုံးဆုတွေကို ကြေညာခဲ့ရာမှာ အကောင်းဆုံးနည်းပြဆုကို စပါးအသင်းနည်းပြ ပိုစတီကိုဂလူးနဲ့ အကောင်းဆုံးကစားသမားဆုကို စပါးအသင်းခေါင်းဆောင် ဆွန်ဟောင်မင်တို့က ရရှိသွားခဲ့ပါတယ်။
ပိုစတီကိုဂလူးဟာ ပြီးခဲ့တဲ့သြဂုတ်လကလည်း ပရီးမီးယားလိဂ်တစ်လတာအကောင်းဆုံးနည်းပြဆုကို ရရှိထားတာကြောင့် ၂ လဆက်တိုက်ဒီဆုကို သိမ်းပိုက်နိုင်ခဲ့တာပါ။ဆွန်ဟောင်မင်ကလည်း ပြီးခဲ့တဲ့လက ကစားခဲ့တဲ့ ပရီးမီးယားလိဂ်ပွဲတွေမှာ အသင်းရလဒ်ကောင်းတွေရရှိအောင် သွင်းဂိုးတွေနဲ့ စွမ်းဆောင်ပေးနိုင်ခဲ့တဲ့အတွက် အခုလို စက်တင်ဘာလအတွက် တစ်လတာအကောင်းဆုံးကစားသမားဆုကို ရရှိခဲ့တာဖြစ်ပါတယ်။
ဆွန်ဟောင်မင်အတွက်တော့ ပရီးမီးယားလိဂ်တစ်လတာအကောင်းဆုံးကစားသမားဆုကို အခုတစ်ကြိမ်အပါအဝင် ၄ ကြိမ်မြောက်ရယူနိုင်ခဲ့တာဖြစ်ပြီး အွန်နရီ၊ ပေါလ်စခိုးလ်၊ အလန်ရှီးယားတို့နဲ့ အရေအတွက်ချင်းတူညီသွားခဲ့တာပါ။
စပါးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ရှုံးပွဲမရှိအကောင်းဆုံးပုံစံရရှိနေပြီး ပွဲစဉ် ၈ ပွဲကစားအပြီးမှာ ရှုံးပွဲမရှိ ရမှတ် ၂၀ ရရှိကာ အာဆင်နယ်အသင်းနဲ့ ရမှတ်တူဂိုးကွာခြားချက်ကြောင့် အဆင့် ၁ နေရာမှာ ဦးဆောင်နေတာဖြစ်ပါတယ်။
