ဂျာမနီအသင်းနည်းပြ ဟန်ဆီဖလစ်က ဂျပန်အသင်းကို ၄ ဂိုး- ၁ ဂိုးနဲ့ ဂိုးပြတ်အရေးနိမ့်ခဲ့ပေမယ့် သူက နိုင်ငံအသင်းကို ကိုင်တွယ်ဖို့အတွက် မှန်ကန်တဲ့နည်းပြလို့ ပြောလိုက်ပါတယ်။
ဂျာမနီအသင်းဟာ ဂျပန်အသင်းကို အရေးနိမ့်ခဲ့တာကြောင့် ခြေစမ်းပွဲ ၃ ပွဲဆက်တိုက်အရေးနိမ့်ခဲ့တာဖြစ်ပြီး နောက်ဆုံးကစားခဲ့တဲ့ ၅ ပွဲမှာ ၄ ပွဲမြောက်ရှုံးနိမ့်ခဲ့တာဖြစ်ပါတယ်။ဂျာမနီအသင်းဟာ လာမယ့်ယူရို ၂၀၂၄ ပြိုင်ပွဲကို အိမ်ရှင်အဖြစ် ကျင်းပရမှာဖြစ်ပေမယ့် ရလဒ်တွေဆက်တိုက်ဆိုသလို ဆိုးရွားနေခဲ့တာပါ။
ဂျာမနီအသင်းဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ အုပ်စုကနေ ထွက်ခဲ့ရသလို လက်ရှိအချိန်ထိ ရလဒ်တွေဆိုးနေခဲ့တာကြောင့် နည်းပြ ဟန်ဆီဖလစ်ဟာ ရာထူးနဲ့ ပတ်သက်ပြီး ဖိအားတွေဝင်ရောက်နေခဲ့တာဖြစ်ပါတယ်။
ဟန်ဆီဖလစ်က “ကျွန်တော်တို့ နည်းပြအဖွဲ့ဝင်တွေဟာ အရာအားလုံးကို ကောင်းမွန်အောင်ကြိုးစားနေပါတယ်။ကျွန်တော်တို့ကောင်းမွန်စွာလုပ်ဆောင်နေပြီး ကျွန်တော်က ဂျာမနီရဲ့မှန်ကန်တဲ့နည်းပြလို့ ထင်ပါတယ်။ဒီရလဒ်ကိုတော့ တကယ်စိတ်ပျက်ပါတယ်”
“ဂျပန်အသင်းက အသင်းကောင်းဖြစ်တာကိုတော့ ကျွန်တော်တို့ဝန်ခံပါတယ်။ဂျာမန်ဘောလုံးလောကဟာ ပြန်ပြီးနိုးထရပါမယ်။အခုကျွန်တော်တို့အကောင်းဆုံးပြင်ဆင်ပြီး ပြင်သစ်နဲ့ပွဲမှာ ကောင်းမွန်အောင်လုပ်ရပါမယ်”လို့ ဆိုခဲ့ပါတယ်။
