အိုဆင်ဟမ်ရဲ့အေးဂျင့်ဖြစ်သူက သူ့ရဲ့ကစားသမားကို ဆိုရှယ်မီဒီယာမှာလှောင်ပြောင်ခဲ့တဲ့ နာပိုလီအသင်းရဲ့အပြုအမူကို တရားဥပဒေအရရေးယူမယ်လို့ ခြိမ်းခြောက်ခဲ့ပါတယ်။
နာပိုလီအသင်းဟာ သူတို့ရဲ့TikTok မှာ တိုက်စစ်မှူး အိုဆင်ဟမ် ဘိုလော့ဂ်နာအသင်းနဲ့ ပွဲမှာ ပင်နယ်တီလွဲခဲ့တာနဲ့အတူ ပင်နယ်တီတောင်းနေတဲ့ ဗီဒီယိုကိုတင်ခဲ့တာပါ။ဒီဗီဒီယို ပြန်ဖျက်ခဲ့ပေမယ့် အိုဆင်ဟမ်ရဲ့အေးဂျင့်ကတော့ နာပိုလီအသင်းကို တရားဥပဒေအရအရေးယူဖို့ စဉ်းစားနေတာဖြစ်ပါတယ်။
အိုဆင်ဟမ်ရဲ့အေးဂျင့်က “နာပိုလီရဲ့တရားဝင်အကောင့်မှာ ဖြစ်ပျက်ခဲ့တဲ့အရာကို လက်ခံနိုင်စရာမရှိပါဘူး။လှောင်ပြောင်ခဲ့တဲ့အနေနဲ့ လူသိရှင်ကြား တင်ခဲ့ပေမယ့် နောက်ပိုင်းမှာ သူတို့ပြန်ဖျက်ခဲ့ပါတယ်။အဲ့ဒါကြောင့် ကျွန်တော်တို့ဟာ တရားဥပဒေအတိုင်းဆောင်ရွက်ခွင့်ရှိတယ်”လို့ ရေးသားခဲ့တာပါ။
https://x.com/FabrizioRomano/status/1706784057479118979?s=20
အိုဆင်ဟမ်နဲ့ ဘိုလော့ဂ်နာအသင်းနဲ့ ဂိုးမရှိသရေကျခဲ့တဲ့ပွဲစဉ်မှာ သူ့ကိုလူစားလဲခဲ့တဲ့ နာပိုလီအသင်းနည်းပြ ရူဒီဂါစီယာနဲ့လည်း ထိပ်တိုက်တွေ့ခဲ့ပြီး သူ့ရဲ့လုပ်ရပ်အတွက် ပွဲအပြီးမှာ နည်းပြနဲ့ အသင်းဖော်တွေကို ပြန်လည်တောင်းပန်ခဲ့တယ်လို့ သိရပါတယ်။
အိုဆင်ဟမ်ဟာ ပြီးခဲ့တဲ့ရာသီက နာပိုလီအသင်းကို နှစ်ပေါင်း ၃၀ ကျော်ကြာဝေးကွာခဲ့တဲ့ စီးရီးအေဖလားရယူနိုင်အောင် စီးရီးအေပြိုင်ပွဲမှာ ၂၆ ဂိုးအထိသွင်းယူကာ ခြေစွမ်းပြသနိုင်ခဲ့တာပါ။အိုဆင်ဟမ်ဟာ အခုနှစ်ရာသီမှာ နာပိုလီအသင်းအတွက် ၃ ဂိုးသွင်းယူပေးထားပါတယ်။
