ဝါရင့်တိုက်စစ်မှူး ဂီရောဒ့်ဟာ အေစီမီလန်အသင်းက ဂျီနိုအာအသင်းကို ၁ ဂိုး- ဂိုးမရှိနဲ့အနိုင်ရခဲ့တဲ့ စီးရီးအေပွဲစဉ်မှာ ဂိုးသမားအဖြစ်လက်စွမ်းပြသနိုင်ခဲ့ပြီးနောက် စီးရီးအေတစ်ပတ်တာအကောင်းဆုံးအသင်းမှာ ဂိုးသမားအဖြစ် ပါဝင်လာခဲ့ပါတယ်။
ဒီပွဲမှာ အေစီမီလန်အသင်းဂိုးသမား မိုင်ဂ်နန်ဟာ ပွဲပြီးဆုံးကာနီးမှာ တိုက်ရိုက်အနီကတ်နဲ့ထုတ်ပယ်ခံရလို့ ဂီရောဒ့်ဟာ ဂိုးသမားအဖြစ် တာဝန်ယူခဲ့ရပြီး ဂျီနိုအာအသင်းရဲ့တိုက်စစ်ဆင်မှုကို အနာခံပြီး ဖျက်ထုတ်ကာ အသင်းအတွက် ဂိုးမပေးရအောင် စွမ်းဆောင်ပေးနိုင်ခဲ့တာဖြစ်ပါတယ်။
အဲ့ဒါကြောင့်လည်း ဂီရောဒ့်ဟာ သူ့ရဲ့တိုက်စစ်မှူးနေရာထက် ဂိုးသမားအဖြစ်နဲ့ စီးရီးအေရဲ့တစ်ပတ်တာ အကောင်းဆုံးအသင်းမှာ ရွေးချယ်ခံရတာပါ။အေစီမီလန်အသင်းကလည်း ဂီရောဒ့်ရဲ့စွမ်းဆောင်မှုကို ဂုဏ်ပြုတဲ့အနေနဲ့ သူ့ရဲ့နာမည်နဲ့နံပတ်ပါ ဂိုးသမားဂျာစီကို ထုတ်ခဲ့ပြီး ပရိသတ်တွေကို ဝယ်ယူလို့ရအောင် လုပ်ပေးခဲ့ပါတယ်။
ပရိသတ်တွေကလည်း ဂီရောဒ့်ရဲ့ဂိုးသမားဂျာစီကို အမှတ်တရသိမ်းဆည်းချင်တာကြောင့် ဒီဂျာစီတွေဟာ အမြန်ဆုံးရောင်းကုန်သွားခဲ့တာဖြစ်ပါတယ်။
