ချယ်လ်ဆီးအသင်းကနေ အငှားနဲ့ လာရောက်ကစားနေတဲ့ ရိုးမားအသင်းတိုက်စစ်မှူး လူကာကူက သူနဲ့ နည်းပြ မော်ရင်ဟိုတို့ အကြားမှာ အပြန်အလှန်ယုံကြည်မှုရှိတယ်လို့ ပြောလိုက်ပါတယ်။
လူကာကူဟာ နွေရာသီအပြောင်းအရွှေ့မှာ အင်တာမီလန်အသင်းထံ အပြီးသတ်မပြောင်းရွှေ့နိုင်ခဲ့သလို ဂျူဗင်တပ်စ်အသင်းနဲ့ အပြောင်းအရွှေ့ပျက်ပြယ်ခဲ့ပြီး ချယ်လ်ဆီးအသင်းကလည်း သူ့ကို အသင်းမှာ မထားချင်ခဲ့တာပါ။နောက်ဆုံးမှာတော့ ချယ်လ်ဆီး၊ ယူနိုက်တက်အသင်းတွေမှာ လက်တွဲခဲ့ဖူးတဲ့ ဆရာဟောင်းမော်ရင်ဟိုရှိတဲ့ ရိုးမားအသင်းဆီ ရာသီအကုန်ထိ အငှားစာချူပ်နဲ့ လူကာကူ ပြောင်းရွှေ့လာခဲ့တာဖြစ်ပါတယ်။
အသက် ၃၀ အရွယ်ရှိ လူကာကူဟာ ကာဂလီယာရီအသင်းကို အနိုင်ရတဲ့ပွဲမှာ ရိုးမားအသင်းအတွက် ၂ ဂိုးသွင်းယူပြီးနောက် ဒီရာသီမှာ ရိုးမားအသင်းအတွက် ၈ ပွဲကစားအပြီးမှာ ၇ ဂိုးအထိ သွင်းယူထားတာပါ။
လူကာကူက “ဒီနွေရာသီမှာ ကျွန်တော်အလုပ်တွေအများကြီးလုပ်ခဲ့ပြီး လူအများအပြားက ကျွန်တော့်အကြောင်းပြောကြပေမယ့် ပြန်ပြောမှာမဟုတ်ပါဘူး။ကွင်းထဲမှာပဲ ကျွန်တော့်တန်ဖိုးကို ပြသသွားမှာပါ။မော်ရင်ဟိုနဲ့ ကျွန်တော့်ကြားမှာ အထူးဆက်ဆံရေးရှိပါတယ်”
“သူက ကျွန်တော့်မိသားစုကို သိပါတယ်။သူက ကျွန်တော့်ကို ယုံကြည်တယ်၊ အပြန်အလှန်ပေါ့”လို့ ဆိုခဲ့တာဖြစ်ပါတယ်။
