ပဲလေ့စ်အသင်းနဲ့ ပွဲစဉ်မှာ ယူနိုက်တက်အသင်းကစားသမားဘ၀ အိမ်ကွင်းပွဲဦးထွက်အဖြစ် ပါဝင်ခွင့်ရခဲ့တဲ့ အမ်ရာဘတ်က နည်းပြ အဲရစ်တန်ဟတ်လိုအပ်တဲ့နေရာမှာ ကစားသွားမှာဖြစ်ပြီး ဂိုးဖမ်းခိုင်းရင်တောင် ဖမ်းသွားမယ်လို့ ပြောခဲ့ပါတယ်။
အမ်ရာဘတ်ဟာ ပဲလေ့စ်အသင်းကို အနိုင်ရခဲ့တဲ့ ကာရာဘောင်းဖလားပွဲစဉ်မှာ ဘယ်နောက်ခံလူအဖြစ် စတင်ကစားခဲ့ရပြီး နောက်ပိုင်းမှ ကွင်းလယ်နေရာမှာ ကတ်စမဲရိုးနဲ့အတွဲညီစွာ ကစားခဲ့ရတာပါ။အမ်ရာဘတ်ဟာ ပဲလေ့စ်အသင်းနဲ့ ပွဲမှာ ခြေစွမ်းပြနိုင်ခဲ့ပြီး ယူနိုက်တက်ပရိသတ်တွေရဲ့အချစ်ကို သိမ်းပိုက်နိုင်ခဲ့ပါတယ်။
အမ်ရာဘတ်က “ပြီးပြည့်စုံတဲ့ညလို့ထင်ပါတယ်။ဒီလိုအခိုက်အတန့်မျိုးဖြစ်ဖို့ကို ကျွန်တော့်ကစားသမားဘဝတစ်လျှောက်၊ ကျွန်တော့်တစ်ဘဝလုံးအလုပ်လုပ်ခဲ့ရတာပါ။ကျွန်တော်ဟာ နည်းပြလိုအပ်တဲ့နေရာမှာ ကစားသွားမယ်လို့ ပြောခဲ့ပါတယ်။ဂိုးသမားနေရာမှာ ကစားရမယ်ဆိုရင်လည်း ကစားသွားမှာဖြစ်ပြီး ဘယ်နေရာမှာကစားကစား အသင်းကို ကူညီပေးသွားမှာပါ”
“ကျွန်တော်ဟာ အကောင်းဆုံးပုံစံမရသေးပါဘူး။ကျွန်တော်ဟာ ဒဏ်ရာရနေလို့ ရာသီကြိုမှာ အကောင်းဆုံးမလုပ်ခဲ့ရပေမယ့် လေ့ကျင့်မှုတွေကို ပြင်းပြင်းထန်ထန်လုပ်ခဲ့ပါတယ်။ကျွန်တော်တို့ဟာ အနိုင်ရဖို့ လိုအပ်တယ်ဆိုတာ ရှင်းပါတယ်”လို့ ဆိုခဲ့ပါတယ်။
ယူနိုက်တက်အသင်းဟာ လာမယ့်စနေနေ့မှာ ပရီးမီးယားလိဂ်ပွဲစဉ်အဖြစ် ပဲလေ့စ်အသင်းနဲ့ပဲ ယှဉ်ပြိုင်ရမှာဖြစ်ပြီး အမ်ရာဘတ်ဟာ အသင်းရဲ့ပွဲထွက်လူစာရင်းမှာ ထပ်ပြီးပါဝင်လာဖွယ်ရှိနေပါတယ်။
