စပါးအသင်းနဲ့ ၂ ဂိုးစီသရေကျခဲ့တဲ့ပွဲအပြီးမှာ နောက်ကျောဒဏ်ရာရရှိခဲ့တဲ့ အာဆင်နယ်အသင်းကွင်းလယ်လူ ဒီကလန်ရိုက်စ်ရဲ့ဒဏ်ရာအခြေအနေဟာ မပြင်းထန်ဘူးလို့ စမ်းသပ်စစ်ဆေးမှုတွေအရ သိရပါတယ်။
အဲ့ဒါကြောင့် ဒီကလန်ရိုက်စ်ဟာ ဘရန်ဖိုဒ့်အသင်းနဲ့ ကစားမယ့် ကာရာဘောင်းဖလားပွဲစဉ်မှာ အာဆင်နယ်အသင်းအတွက် ပါဝင်နိုင်မှာမဟုတ်ပေမယ့် ဘုန်းမောက်အသင်းနဲ့ ပရီးမီးယားလိဂ်ပွဲစဉ်မှာတော့ ပြန်လည်ပါဝင်လာနိုင်ဖွယ်ရှိနေတာပါ။ဒါပေမယ့် သတင်းအချို့မှာတော့ ဒီကလန်ရိုက်စ်ဟာ မန်စီးတီးအသင်းနဲ့ ပွဲစဉ်မှသာ ကြံ့ခိုင်မှုအပြည့်နဲ့ ပါဝင်နိုင်ဖွယ်ရှိနေတယ်လို့ ဖော်ပြထားတာပါ။
ပြီးခဲ့တဲ့ နွေရာသီအပြောင်းအရွှေ့က ပေါင်သန်း ၁၀၀ နဲ့ ဝက်စ်ဟမ်းအသင်းကနေ ရောက်ရှိလာတဲ့ ဒီကလန်ရိုက်စ်ဟာ ဒီရာသီမှာ အာဆင်နယ်အသင်းအတွက် ပွဲတိုင်းပါဝင်ကစားခဲ့ပြီး ခြေစွမ်းပြသနိုင်ခဲ့ကာ ယူနိုက်တက်အသင်းကို အနိုင်ရခဲ့တဲ့ပွဲမှာ အာဆင်နယ်အသင်း ကစားသမားဘ၀ ပထမဆုံးသွင်းဂိုးကို သွင်းယူနိုင်ခဲ့တာဖြစ်ပါတယ်။
အာဆင်နယ်အသင်းဟာ စပါးအသင်းနဲ့ ပွဲမှာ သရေကျခဲ့တာကြောင့် ထိပ်ဆုံးက မန်စီးတီးအသင်းနဲ့ ၄ မှတ်ကွာဟနေခဲ့ပြီး ပရီးမီးယားလိဂ်အဆင့် ၅ နေရာမှာ ရပ်တည်နေပါတယ်။ ဒီနှစ်သင်းဟာ အောက်တိုဘာ ၈ ရက်မှာ ပရီးမီးယားလိဂ်ပွဲစဉ်အဖြစ် ထိပ်တိုက်တွေ့ဆုံရမှာဖြစ်ပါတယ်။
