ယူနိုက်တက်အသင်းခေါင်းဆောင် ဘရူနိုဖာနန်ဒက်စ်ဟာ ဘန်လေအသင်းကို ယူနိုက်တက်အသင်းက ၁ ဂိုး- ဂိုးမရှိနဲ့ အနိုင်ရခဲ့တဲ့ ပွဲစဉ်မှာ ရရှိခဲ့တဲ့ အကောင်းဆုံးကစားသမားဆုကို အသင်းဖော်နောက်ခံလူ ဂျွန်နီအီဗန်စ်ကို ပေးခဲ့တာဖြစ်ပါတယ်။
ဘရူနိုဖာနန်ဒက်စ်ဟာ ဝါရင့်နောက်ခံလူ ဂျွန်နီအီဗန်စ်ရဲ့ကောင်းမွန်တဲ့ဖန်တီးပေးမှုကို လှပတဲ့ကန်သွင်းချက်နဲ့ အဆုံးသတ်ပြီး ၃ ပွဲဆက်တိုက်အရေးနိမ့်ခဲ့တဲ့ ယူနိုက်တက်အသင်းကို နိုင်ပွဲပြန်လည်ရှာဖွေပေးနိုင်ခဲ့တာဖြစ်ပါတယ်။ ဘရူနိုဖာနန်ဒက်စ်ဟာ ဒီပွဲရဲ့အကောင်းဆုံးကစားသမားဆုကို ရခဲ့ပေမယ့် ဂျွန်နီအီဗန်စ်က ပိုထိုက်တန်တယ်ဆိုပြီး ဒီဆုကို ပေးခဲ့တာပါ။
ပြီးခဲ့တဲ့နွေရာသီအပြောင်းအရွှေ့ကမှ အသင်းဟောင်း ယူနိုက်တက်အသင်းထံ တစ်နှစ်စာချုပ်နဲ့ ပြန်လည်ရောက်ရှိလာခဲ့တဲ့ ဂျွန်နီအီဗန်စ်ဟာ နှစ်ပေါင်းများစွာကြာဝေးကွာနေတဲ့ အသင်းဟောင်းအတွက် ပွဲထွက်ခွင့်ရတဲ့ပွဲမှာ အကောင်းဆုံးစွမ်းဆောင်နိုင်ခဲ့တာဖြစ်ပါတယ်။ဂျွန်နီအီဗန်စ်ဟာ ယူနိုက်တက်အတွက် ၁ ဂိုးသွင်းယူခဲ့ပေမယ့် ပယ်ဖျက်ခံခဲ့ရတာကြောင့် နစ်နာခဲ့ရတာပါ။
ဂျွန်နီအီဗန်စ်က “မိနစ်တိုင်းကို ချစ်တယ်။ဒီပွဲက ကျွန်တော့်အတွက် ယူနိုက်တက်ကစားသမားဘဝပွဲပေါင်း ၂၀၀ ပြည့်တဲ့ပွဲပါ။ဒီလိုကိန်းဂဏန်းကို ရောက်မယ်လို့ ဘယ်တုန်းကမှမတွေးခဲ့ဖူးပေမယ့် ဒါက ကျွန်တော့်ဘဝရဲ့အကောင်းဆုံးညပါ”လို့ ဆိုခဲ့ပါတယ်။
နည်းပြ အဲရစ်တန်ဟတ်ကလည်း ဂျွန်နီအီဗန်စ်ရဲ့စွမ်းဆောင်ရည်ကောင်းတွေကို ပွဲအပြီးမှာ ချီးကျူးမှုပြုလုပ်သွားခဲ့ပါတယ်။ယူနိုက်တက်အသင်းဟာ ကြားရက်မှာ ပဲလေ့စ်အသင်းနဲ့ ကာရာဘောင်းဖလား ယှဉ်ပြိုင်ရမှာဖြစ်ပြီး ဂျွန်နီအီဗန်စ်ဟာ ဒီပွဲမှာ အသင်းအတွက် ဆက်လက်ပွဲထွက်ခွင့်ရဖွယ်ရှိနေပါတယ်။
