လီဗာပူးလ်အသင်းဟာ နိုင်ငံတကာပွဲစဉ်အပြီး ပထမဆုံးပွဲစဉ်အဖြစ်ပြန်ကစားမယ့် ဝုလ်ဗ်စ်အသင်းနဲ့ ပွဲအတွက် ကြာသပေတေးနေ့က လေ့ကျင့်မှုတွေကို စတင်နေခဲ့ပြီး ဒီအစီအစဉ်ကိုကစားသမား ၄ ဦးအထိ လွဲချော်ခဲ့တာဖြစ်ပါတယ်။
လီဗာပူးလ်အသင်းရဲ့ကစားသမားတွေဖြစ်တဲ့ အာနိုးလ်၊သီယာဂို၊ကိုနာတေးနဲ့ ဒါဝင်နူနက်ဇ်တို့ဟာ ဒီအစဉ်ကို လွဲချော်ခဲ့တာပါ။အာနိုးလ်ကတော့ ပြီးခဲ့တဲ့ ပရီးမီးယားလိဂ်ပွဲဖြစ်တဲ့ အက်စတွန်ဗီလာအသင်းနဲ့ပွဲမှာ တံကောက်ကြောဒဏ်ရာရရှိထားပြီး အင်္ဂလန်အသင်းရဲ့လူစာရင်းကနေတောင် နုတ်ထွက်ခဲ့ရပါတယ်။
ဒါဝင်နူနက်ဇ်ဟာ ဥရုဂွေးအသင်းနဲ့ နိုင်ငံတကာပွဲစဉ်တွေသွားရောက်ယှဉ်ပြိုင်ချိန်မှာ ကြွက်သားနာကျင်မှုတွေကို ခံစားခဲ့ရပြီး ကိုနာတေးကတော့ ပေါင်ဒဏ်ရာကြောင့် ပြီးခဲ့တဲ့ပွဲစဉ် ၂ ပွဲကို လွဲချော်ခဲ့တာပါ။သီယာဂိုကတော့ သူ့ရဲ့ကြံ့ခိုင်မှုပိုင်းကို ကောင်းမွန်အောင်လုပ်ဆောင်နေခဲ့လို့ ဝုလ်ဗ်စ်နဲ့ ပွဲကိုလည်း လွဲချော်မှာဖြစ်ပါတယ်။
လီဗာပူးလ်အသင်းဟာ အခုနှစ်ရာသီအစပိုင်းမှာ ရလဒ်ကောင်းနေပြီး ပရီးမီးယားလိဂ် ၄ ပွဲကစားအပြီးမှာ ၃ ပွဲနိုင်၊ ၁ ပွဲသရေရရှိထားပြီး လာမယ့်ဝုလ်ဗ်စ်အသင်းနဲ့ ပွဲမှာလည်း ရှုံးပွဲမရှိမှတ်တမ်းကောင်းကို ဆက်ပြီးထိန်းသိမ်းနိုင်ဖို့ မျှော်လင့်နေတာဖြစ်ပါတယ်။
