ဖူလ်ဟမ်အသင်းကွင်းလယ်လူ ပယ်လ်ဟင်ညာဟာ အသင်းမှာ ၂၀၂၈ ခုနှစ်အထိရှိမယ့် စာချုပ်သစ်ချုပ်ဆိုလိုက်ပြီဖြစ်ပါတယ်။ဖူလ်ဟမ်နဲ့ အရင်ချုပ်ဆိုထားတဲ့ စာချုပ်ဟာ ၂၀၂၇ ခုနှစ်အထိ သက်တမ်းရှိသေးပေမယ့် ၁ နှစ်သက်တမ်းထပ်ပြီးတိုးခဲ့တာဖြစ်ပါတယ်။
ပေါ်တူဂီကွင်းလယ်လူဟာ ပြီးခဲ့တဲ့ နွေရာသီအပြောင်းအရွှေ့နောက်ဆုံးနေ့က ဘိုင်ယန်မြူးနစ်အသင်းထံ ပြောင်းရွှေ့ဖို့ နီးစပ်ခဲ့ပြီး ဆေးစစ်မှုတွေပါခံယူခဲ့ပေမယ့် ဖူလ်ဟမ်အသင်းနဲ့ ပြောင်းရွှေ့ကြေး အဆင်မပြေတာကြောင့် အပြောင်းအရွှေ့ပျက်ပြယ်ခဲ့တာဖြစ်ပါတယ်။
အဲ့ဒါကြောင့် ပယ်လ်ဟင်ညာကို ဘိုင်ယန်မြူးနစ်အသင်းက ဇန်နဝါရီအပြောင်းအရွှေ့မှာ ပြန်လည်ခေါ်ယူဖို့အတွက် ကြိုးစားဖို့ ရှိနေပေမယ့် ဖူလ်ဟမ်အသင်းနဲ့ စာချုပ်သစ်ချုပ်လိုက်တာကြောင့် ဂျာမန်ကလပ်အတွက် ကြီးမားတဲ့ ထိုးနှက်ချက်ဖြစ်လာဖို့ ရှိနေပါတယ်။
ပယ်လ်ဟင်ညာကတော့ ပြီးခဲ့တဲ့ ရက်သတ္တပတ်တွေအတွင်းမှာ သူ့ရဲ့အနာဂတ်နဲ့ ပတ်သက်ပြီး သတင်းတွေအများအပြားထွက်ပေါ်ခဲ့ပေမယ့် သူကတော့ ဖူလ်ဟမ်အသင်းနဲ့ စာချုပ်သစ်ချုပ်ပြီး ကတိကဝတ်တွေကို ပြသနိုင်ခဲ့တယ်လို့ ပြောခဲ့ပါတယ်။
၂၀၂၂ ခုနှစ်က စပို့တင်းလစ္စဘွန်းအသင်းကနေ ရောက်ရှိလာခဲ့တဲ့ ပယ်လ်ဟင်ညာဟာ ဖူလ်ဟမ်အသင်းအတွက် (၄၃)ပွဲပါဝင်ကစားထားပြီး (၅)ဂိုးသွင်းယူထားပါတယ်။
