ယူနိုက်တက်အသင်းမှာ ပွဲထွက်ခွင့်ဆုံးရှုံးနေတဲ့ နောက်ခံလူ မက်ဂွဲယားက သူအသင်းအတွက် ပွဲတွေအများကြီးကစားပေးရတော့မယ်ဆိုတာ သိတယ်လို့ ပြောလိုက်ပါတယ်။
မက်ဂွဲယားဟာ ဒီရာသီမှာ ယူနိုက်တက်အသင်းအတွက် ပရီးမီးယားလိဂ်ပွဲမှာ အာဆင်နယ်အသင်းကို အရေးနိမ့်ခဲ့တဲ့ ပွဲစဉ်မှသာ လူစားဝင်ကစားသမားအဖြစ်ပါဝင်ခဲ့ရတာပါ။ယူနိုက်တက်အသင်းဟာ ပြီးခဲ့တဲ့ အပြောင်းအရွှေ့က မက်ဂွဲယားကို ရောင်းချဖို့ ရှိခဲ့ပေမယ့် နောက်ခံလူတွေရဲ့ဒဏ်ရာကြောငိ့ ဆုံးဖြတ်ချက်ပြန်ပြောင်းခဲ့ရတာဖြစ်ပါတယ်။
မက်ဂွဲယားက “ကျွန်တော်ကလပ်အသင်းအတွက် ပွဲကစားခွင့်တွေရချင်ပါတယ်။လက်ရှိအချိန်မှာ ပထမ ၄ ပတ်က ကျနော့်အတွက် ခက်ခဲခဲ့ပြီး ၁ ပွဲပဲကစားခဲ့ရပါတယ်။နည်းပြကလည်း ကျွန်တော့်ကို မရွေးချယ်ခဲ့ပါဘူး။အခု ကျွန်တော်တို့ဟာ ပွဲတွေအများကြီးကစားရတော့မှာပါ။အဲ့ဒါကြောင့် ကျွန်တော် ပွဲတွေအများကြီးကစားရမယ်ဆိုတာ သေချာတယ်”လို့ဆိုခဲ့ပါတယ်။
ယူနိုက်တက်အသင်းဟာ ဗာရန်းဒဏ်ရာကြောင့် လင်ဒီလော့ဖ်နဲ့ လီဆန်ဒရိုမာတီနက်ဇ်တို့ကို ပွဲထွက်လူစာရင်းမှာ အသုံးပြုနေပေမယ့် လီဆန်ဒရိုမာတီနက်ဇ်ကြံ့ခိုင်မှုမပြည့်ဝရင်တော့ မက်ဂွဲယားကို ဘရိုက်တန်အသင်းနဲ့ပွဲမှာ ပွဲထွက်အသုံးပြုလာဖွယ်ရှိနေတာဖြစ်ပါတယ်။
