လေဗာကူဆင်အသင်းဟာ အခုနွေရာသီအပြောင်းအရွှေ့မှာ အသင်းရဲ့အဓိက ပစ်မှတ်ဖြစ်တဲ့ ရှာခါကို ခေါ်ယူဖို့ အာဆင်နယ်အသင်းနဲ့ သဘောတူညီမှုအပြည့်အ၀ ရရှိသွားပြီလို့ ဖာဘရီဇီယိုရိုမန်နိုက ရေးသားခဲ့ပါတယ်။
ရှာခါရဲ့အပြောင်းအရွှေ့အတွက် မေလကတည်းက ကလပ်နှစ်သင်းကြား သဘောတူညီမှုရရှိခဲ့တာဖြစ်ပြီး အာဆင်နယ်အသင်းဟာ ဒီကလန်ရိုက်စ်ကို ခေါ်ယူနိုင်ဖို့ သေချာသွားပြီးနောက် အပြောင်းအရွှေ့အတွက် မီးစိမ်းပြသခဲ့တာပါ။ အာဆင်နယ်အသင်းဟာ ရှာခါရဲ့အပြောင်းအရွှေ့အတွက် ယူရို (၂၅)သန်း ရရှိမယ်လို့ သိရပါတယ်။
လေဗာကူဆင်အသင်းဟာ ရှာခါကို ၂၀၂၈ ခုနှစ် ဇွန်လအထိ (၅)နှစ်စာချုပ်ချုပ်ဆိုမှာဖြစ်ပါတယ်။ အသက်(၃၀)အရွယ်ရှိ ရှာခါဟာ အာဆင်နယ်အသင်းကို ၂၀၁၆ ခုနှစ်က ဂျာမန်ကလပ် မိုချန်ဂလာဘတ်ကနေ ရောက်ရှိလာခဲ့တာဖြစ်ပြီး အသင်းအတွက် ပွဲပေါင်း (၂၉၇)ပွဲပါဝင်ကစားကာ (၂၃)ဂိုးသွင်းယူနိုင်ခဲ့ပါတယ်။
ဆွစ်ဇာလန်ကစားသမားဟာ အာဆင်နယ်အသင်းနဲ့အတူ FA ဖလား(၂)ကြိမ်နဲ့ ကွန်မြူနတီဒိုင်း(၂)ကြိမ် ရယူနိုင်ခဲ့ပြီး မနှစ်ကရာသီက အသင်း ပရီးမီးယားလိဂ်ဖလားရယူနိုင်ဖို့ နီးစပ်တဲ့ အခြေအနေအထိရောက်ရှိအောင် စွမ်းဆောင်ပေးနိုင်ခဲ့တာဖြစ်ပါတယ်။
အာဆင်နယ်အသင်းဟာ အခုအပြောင်းအရွှေ့မှာ ချယ်လ်ဆီးက ဟာဗတ်ဇ်ကို ခေါ်ယူနိုင်ခဲ့ပြီးနောက် ဒီကလန်ရိုက်စ်နဲ့ တင်ဘာရဲ့အပြောင်းအရွှေ့ကို အပြီးသတ်နေတာဖြစ်ပါတယ်။
