ဒိန်းမတ်လက်ရွေးစင်ကစားသမား ဟော့ဂျ်လန်းဟာ ယူနိုက်တက်အသင်းထံ အပြီးသတ်ပြောင်းရွှေ့ဖို့အတွက် ကာရင်တန်မှာ ဆေးစစ်မှုပြုလုပ်ခဲ့ပြီးဖြစ်သလို အသင်းနဲ့ အင်တာဗျူးပါ ပြုလုပ်ခဲ့ပြီးဖြစ်တယ်လို့ သိရပါတယ်။
ဟော့ဂျ်လန်းဟာ ဒီနေ့မှာ ယူနိုက်တက်အသင်းနဲ့ လက်မှတ်ရေးထိုးသွားမှာဖြစ်လို့ အပြောင်းအရွှေ့ကိုပါ ကြေညာသွားဖွယ်ရှိနေတာပါ။အတ္တလန်တာတိုက်စစ်မှူးဟာ အခုအပြောင်းအရွှေ့မှာ ယူနိုက်တက်အသင်းထံ ရောက်ရှိလာမယ့် တတိယမြောက်ကစားသမားလည်း ဖြစ်ပါတယ်။
ယူနိုက်တက်အသင်းဟာ ဟော့ဂျ်လန်းကို ပေါင် ၇၃ သန်းနဲ့ ၅ နှစ်စာချုပ်ချုပ်ဆိုမှာဖြစ်ပြီး နောက်ထပ်တစ်နှစ်သက်တမ်းတိုးခွင့်လည်း ပါဝင်မယ်လို့ သိရပါတယ်။ဟော့ဂျ်လန်းကို ခေါ်ယူဖို့ ပီအက်စ်ဂျီအသင်းကလည်း စိတ်ဝင်စားခဲ့ပေမယ့် ကစားသမားက ယူနိုက်တက်အသင်းထံ ပြောင်းရွှေ့ဖို့ သာ ဆုံးဖြတ်ခဲ့တာပါ။
ဟော့ဂျ်လန်းဟာ ယူနိုက်တက်အသင်းနဲ့ အပြောင်းအရွှေ့ဖြစ်မြောက်ဖို့အတွက် ဘုန်းမောက်အသင်းနဲ့ ကစားခဲ့တဲ့ ရာသီကြိုခြေစမ်းပွဲမှာ အတ္တလန်တာအသင်းအတွက် မပါဝင်ခဲ့ပါဘူး။ဒါ့အပြင် ဟော့ဂျ်လန်းဟာ အသင်းဖော်တွေကို နှုတ်ဆက်ခဲ့ပြီးဖြစ်တယ်လို့လည်း သိရပါတယ်။
ဟော့ဂျ်လန်းဟာ ပြီးခဲ့တဲ့ရာသီက အတ္တလန်တာအသင်းအတွက် စီးရီးအေ ၃၂ ပွဲပါဝင်ကစားခဲ့ပြီး ၉ ဂိုးသွင်းယူကာ ၄ ဂိုးဖန်တီးနိုင်ခဲ့တာပါ။ဟော့ဂျ်လန်းဟာ ရာသီသစ်မှာ ယူနိုက်တက်ရဲ့အဓိက တိုက်စစ်မှူးအဖြစ် ပါဝင်ရမှာဖြစ်ပါတယ်။
