လေဗာကူဆင်အသင်းဟာ မနေ့က ကစားခဲ့တဲ့ ဘွန်ဒစ်လီဂါပွဲစဉ်မှာ ဘိုင်ယန်မြူးနစ်အသင်းကို ၃ ဂိုး- ဂိုးမရှိနဲ့ ဂိုးပြတ်အနိုင်ရပြီး အမှတ်ပေးဇယားကို ၅ မှတ်ဖြတ်ပြီး ဦးဆောင်လိုက်ပါတယ်။
လေဗာကူဆင်အသင်းအတွက်ဂိုးတွေကို စတန်ဆစ်၊ဂရီမယ်လ်ဒိုနဲ့ ဖရင်ပေါင်တို့က သွင်းယူခဲ့တာပါ။ဘိုင်ယန်မြူးနစ်အသင်းဟာ ဒီပွဲမှာ လေဗာကူဆင်အသင်းကို ဘောလုံးပိုင်ဆိုင်မှုသာ အသာစီးရယူနိုင်ခဲ့တာဖြစ်ပြီး ဂိုးပေါက်ကန်သွင်းမှုနဲ့ ဂိုးပေါက်တည့်မှုတွေမှာ လေဗာကူဆင်အသင်းက အပြတ်အသာစီးရရှိခဲ့တာဖြစ်ပါတယ်။
လေဗာကူဆင်အသင်းဟာ ဂိုးပေါက်ကန်သွင်းမှု ၁၄ ကြိမ်အထိပြုလုပ်ခဲ့ပြီး ဂိုးပေါက်တည့်မှု ၈ ကြိမ်အထိရှိခဲ့တာပါ။ဘိုင်ယန်မြူးနစ်အသင်းကတော့ ဂိုးပေါက်ကန်သွင်းမှု ၉ ကြိမ်နဲ့ ဂိုးပေါက်တည့်မှု ၁ ကြိမ်သာရှိခဲ့တာဖြစ်ပါတယ်။လေဗာကူဆင်အသင်းအတွက်တော့ ဒီနိုင်ပွဲကြောင့် ဘိုင်ယန်မြူးနစ်အသင်းကို ၅ မှတ်အထိဖြတ်နိုင်ခဲ့တာပါ။
ပြိုင်ပွဲပြီးဆုံးဖို့ အများကြီးကျန်ရှိနေပေမယ့် လေဗာကူဆင်အသင်းအတွက်တော့ ဒီရာသီမှာ ဘွန်ဒစ်လီဂါချန်ပီယံဆုကို ရယူနိုင်ဖို့ အခြေအနေကောင်းတွေပိုင်ဆိုင်သွားပြီလို့ ပြောရမှာပါ။အခုဆိုရင် လေဗာကူဆင်အသင်းဟာ ပြိုင်ပွဲစုံ ၃၁ ပွဲအထိ ရှုံးပွဲမရှိစံချိန်တင်ထားပြီး ဘယ်လောက်အထိ ထပ်ပြီးစံချိန်တင်မလဲဆိုတာ ဆက်ပြီးစောင့်ကြည့်ရမှာဖြစ်ပါတယ်။